Қазақстанның болашағы, оның қауіпсіздігі бүгінгі күні жастарды көп ойландыра бермейтін секілді. Әсіресе міндетті әскери қызметті өтеуге келгенде жастар бұғып қалуға тырысады. Содан болар, оларды кез-келген жерде ұстап, күштеп әкетіп жатқаны туралы ақпараттар әлеуметтік желі беттерінде ұшырасып қалады.
Мәселен, қазір әскерге барудан 20 мың жігіт қашып жүрген көрінеді. Жүз емес, екі жүзі емес жиырма мың! Рас, болса, бұл өте көп. Әскери тілмен айтатын болсақ, бұл дегеніміз 1 дивизия деген сөз. Немесе 2 бригада, 10 полк, 16-17 батальон деген сөз. Осыншама әскери құрама шығады. Ал қарулы күштеріміздің құрамы не бәрі 40 мыңның үстінде. Әскери міндеттің мерзімі 1 жыл ғана. Соған барудан жастарымыз қашып жүр. Бұл не болғаны сонда? Елді кім күзетеді? Жастардың бойында елін, жерін қорғасам деген партиоттық сезім неге жоқ? Әлде Ұлттық идеологиямыз ақсап жатыр ма? Жер-жерде соғыс ошақтары тұтанып, іргелі елдер әлсіздерге әлімжеттік жасап жатқан тұста, шекарамыз берік, әскеріміз сайлы тұруы тиіс емес пе! Әйтпесе әркімнің бір жемтігіне айналып кетуіміз сөзсіз. Осы тұста жастарды Отан қорғауға шақыратын әскери -патриоттық бағдарламалар керек секілді.
Азаматхан ӘМІРТАЙ
