Еліміздің экологиясы күнен күнге құлдырап бара жатқаны белгілі. Оны қалай сақтап қаламыз? Мәселенің үлкені осы. Өйткені дені сау ұрпақты қалыптастыру үшін алдымен таза ауа, таза су, құнарлы тамақ, қоршаған ортаның тұмса тазалығы қажет-ақ.
«Байтақ» жасылдар партиясы сол үшін жұмыс істеп жатқаны әмбеге аян. Алайда бізге қарсы жасалып жатқан бөгет көп. Соның бірі «Аманат» партиясының бізге мүмкіндіктер бермеуі. Мәселен, парламенттегі экология комитетін бізге беруі тиіс еді. Ол жоқ. Тіпті жұмыс топтарынада шақырмайды. Су кодесі, эко кодекс бойынша дым жұмыс істетпей жатыр. Ал, өздері құрғақ сөзден арыға бара алмауда. Мұны қалай түсінуге болады? Парламент қабырғасында отырып алып, бос көпірумен еліміздің экологиясын сақтап қала алмайтынымыз белгілі. Нақты істер қажет. Оған біз дайынбыз. Әр аймаққа қатысты нақты жобалар, сындарлы бағдарламаларымыз бар. Бір мысал келтіре кетейін, Семей орманы өртенетіннен 1,5 ай бұрын Мәжіліс Парламентінде біз жағдайды айттық. Одан кейін Үкіметке депутаттық сауал жолдадық. Сол кездегі министр Зульфия Сүлейменоваға және орынбасарларына тікелей айттық. Олардың уақытылы шара қолданбаған себебінен орман өртеніп кетті. Міне, елімізге қаншалықты зиян келді. Бұл бір министрліктің қоршаған ортаға деген салғырттығы. Бұдан да басқа ондаған мысалдар келтіруге болады. Сондықтан жасылдар партиясы «Байтаққа» бөгет жасамай, мүмкіндікті берген дұрыс. Өйткені «Байтақ» қолдан келгенше, нақты қадамдар жасай отырып, еліміздің экологиясын сауықтыруға күш салмақ.
Азаматхан ӘМІРТАЙ
«Байтақ» жасылдар партиясының төрағасы
