Қазақстанның халық жазушысы, ақиық ақын Мұхтар Шаханов денсаулығына байланысты жансақтау бөліміне түсті деген суыт хабар қалың елдің қабырғасын қайыстырды. Бұл — жай ғана белгілі бір қаламгердің науқастануы емес, бұл — ұлт рухының, халықтың ар-ожданына айналған тұлғаның хәлі. Ақын тағдырына алаңдаған жұрт оның тезірек сауығып, ортамызға аман оралуын тілеп, ақ тілек пен дұғасын арнап жатыр.
Ақынның жағдайы туралы хабарлаған Нұржігіт Ысқақ та елді бірлікке, тілекке шақырып, «көкеміздің тез сауығып кетуіне дұға жасайық» деп үн қатты. Саналы ғұмырын сөз өнеріне, ұлттың рухани биігіне арнаған Мұхтар Шаханов — қазақ поэзиясында қайталанбас қолтаңба қалдырған дара тұлға. Оның жырлары — жай ғана ұйқас пен ырғақ емес, ол — ардың үні, намыстың найзасы, ұлттың жүрек соғысы. Ақын поэзиясы әрқашан адамзаттық биік мұраттарды ту етіп, рухани тазалық пен жауапкершілікті алдыңғы қатарға қоя білді. Оның әрбір өлеңі оқырманын ойландырмай қоймайды, селт еткізбей өтпейді. Ол тек ақын болып қалған жоқ, ел тағдыры сынға түскен сәттерде үнсіз қалмаған қайраткер бола білді. Әсіресе Желтоқсан оқиғасы кезінде оның әділет жолындағы батыл қадамы, қазақ жастарының шындығын қорғаудағы табандылығы — тарих алдында өшпес із қалдырды. Бұл оның азаматтық болмысының қаншалық биік екенін айғақтайды. Ұлттың намысы тапталған тұста сөзбен де, іспен де күресе білген мұндай тұлғалар сирек. Мұхтар Шаханов шығармашылығы қазақ даласымен ғана шектеліп қалған жоқ. Оның үні түркі әлеміне кеңінен таралып, бауырлас халықтардың рухани кеңістігінде өз орнын тапты. Түркі дүниесінің тұтастығы, ортақ құндылықтары туралы толғаныстары оның еңбектерінде айқын көрініс тапқан. Осы арқылы ол тек ұлттық деңгейдегі емес, халықаралық дәрежедегі рухани тұлғаға айналды. Бүгінде халықтың жүрегінен ерекше орын алған ақынның ауыр хәлде жатуы — барша жұрттың жанына батады. Себебі ол — тек шығармашылық иесі емес, ол — тұтас бір дәуірдің үні, халықтың жан дүниесін сөйлеткен сана иесі. Оның сөзімен сусындаған ұрпақ үшін бұл хабар ауыр тиіп отыр. Осындай сәтте ел болып тілек тілеу, жақсы сөз айту — біздің адамгершілік парызымыз. Ақынның ғұмыры — халықтың рухани ғұмырымен сабақтас. Сондықтан оның амандығы — барша қазақтың тілегі. Қазақтың ақиық ақыны Мұхтар Шаханов бұл сынақтан да аман өтіп, қайтадан ортамызға ораларына сенім мол. Оның рухы мықты, сөзі тірі, ал халықтың ықыласы — оған демеу.
Азаматхан ӘМІРТАЙ «Байтақ» Жасылдар партиясының төрағасы
