«Самұрық – Қазына» Ұлттық әл-ауқат қорына байланысты соңғы жылдары әңгіме көп. Әсіресе келеңсіз жақтары жөнінде. Биылда оны тарату мәселесі қозғалды. Парламент төрінен. Тіпті президент Қасым –Жомарт Тоқаевтың өзі Қаңтар оқиғасынан кейін «Самұрық-Қазынаны» реформалау керек дегенді айтқан.
Биылғы қаңтардағы Үкіметтің кеңейілген отырысында аталмыш қорға жүргізіліп жатқан реформаға көңілі толмайтынын тағы қайталаған-ды. Расында мемлекет ішіндегі мемлекет болып, елдегі бүкіл ірі компанияларды, қаржы көздерін бір уысқа жинақтап отырған бұл қордың «ақ дегені алғыс, қара дегені қарғыс» болып отырғаны анық. Сәл тарқатып айтар болсақ, «Самұрық –Қазына» 2008 жылы сол кездегі президент Назарбаевтың жарлығымен құрылған. Мақсат – елдегі қаржы ағысын бір орталыққа жинақтау. Қорға кіретін 300 – ге тарта компанияларды тізбей-ақ, мыналарды айта кетсек те жетеді: «КазМунайГаз», «Казатомпром», «Қазақстан темір жолы», «Эйр Астана» , «Казпочта» , «KEGOC», «Казахтелеком», «QazaqGaz» тб. Жалпы, «бұл қор экономиканы оңтайландыру емес, үлкен ақшаны ұрлау, соның ізін жасыру істерімен айналысады» деген ел аузындағы сөзде шындық бар секілді. Бұл жөнінде анық-қанығын сүзгіден өткізіп, келер жазбамызда кеңірек тоқталамыз. Қазір бізге белгілі бір жайт, ол – Жоғары аудиторлық палата әл-ауқат қорына тексеріс жүргізіп жатыр. Ол шілде айында аяқталады. Палатаның төрағасы экс-премьер Әлихан Смайылов. Кеізінде Үкімет басқарған бұл азамат «қарға қарғаның көзін шұқымайды» деп жылы жауып қоя сала ма әлде президенттің сенімін ақтап, «Самұрықтағы» былық-шылықты ашып –аршып, қордың жабылуына нүкте қоя ма? Белгісіз. Бір белгілі жайт, ол – «Самұрық – Қазынаны» таратып, нарықтағы бәсекелестікке жол беру керек. Сонда ғана, ел экономикасында қозғалыс болады.
Азаматхан Әміртай
