Астана, Алматы және Шымкент қалаларының жастары айына 12 мың теңге төлеп, пәтер жалдап тұра алады. Бұл туралы қоғамдық даму министрі Дархан Кәлетаев айтты, – деп хабарлайды Tengrinews.kz тілшісі.
«Ол жалдамалы баспана болады. Көп дегенде үш жылға созуға болатын жалдамалы пәтер туралы келісімшартқа қол қоюды ұсынамыз. Жалдамалы пәтердің ай сайынғы төлемі 10-12 мың теңге болады», – деді министр.
Кәлетаевтың айтуынша, пәтерлер салынып жатқанда әкімдік өкілдері пәтерді жастарға жалға беру үшін оны «нарықтан» сатып алады.
«Осы санаттағы пәтерлерге үміткерлердің параметрлерін дайындадық. Бірінші талап – 29 жасқа дейінгі жастар. Екіншісі – жалға алатын адам міндетті түрде жұмыс істеуі керек. Берілетін пәтерлердің аумағы 40-50 шаршы метр болады деп болжанып отыр», – деді Дархан Кәлетаев.
Еске салайық, мұның алдында Президент Нұрсұлтан Назарбаев Жастар жылын жариялай отырып, жұмыс істейтін жастардың өз баспанасы болуы тиіс екенін айтқан еді.
Дереккөз: kaz.tengrinews.kz
