Нархоз университеті халықаралық деңгейдегі беделін тағы бір мәрте нығайтып, IREG Observatory on Academic Ranking and Excellence қауымдастығының құрамына енді. Бұл маңызы зор оқиға 2024 жылдың 7-8 қарашасында Бухарестте (Румыния) өткен IREG 2024 «Жасанды интеллект: Жоғары білім мен рейтингтерді өзгерту» конференциясында атап өтілді.
IREG-тің мүшелігіне қосылу университеттің ғаламдық деңгейде танылуына, халықаралық байланыстарын кеңейтуге және білім сапасын жоғарылатуға бағытталған тағы бір қадам болды. Бұл мәртебе университеттің академиялық артықшылыққа деген ұмтылысын, жоғары стандарттарды ұстанатындығын және білім беру инновацияларын дамытуға бейілділігін растайды. Сонымен қатар, бұл университетке ғаламдық деңгейдегі сарапшылар қауымдастығымен тығыз байланыс орнатып, алдыңғы қатарлы тәжірибемен алмасуға, рейтинг әдістемелерін жетілдіруге және халықаралық рейтингтердегі позициясын нығайтуға мүмкіндік береді. Мұның бәрі шетелдік студенттер мен зерттеушілерді тартуда маңызды рөл атқарады.
IREG Observatory on Academic Ranking and Excellence – бұл университеттер мен академиялық рейтингтерге мүдделі халықаралық коммерциялық емес қауымдастық. Ол 2004 жылы Бухаресттегі ЮНЕСКО-ның Еуропалық жоғары білім орталығы және Вашингтондағы Жоғары білім саясаты институтымен бірлесіп Халықаралық рейтинг сарапшылары тобы ретінде құрылған, ал 2009 жылы рейтингтер мен академиялық артықшылық туралы қоғамдық хабардарлықты арттыру мақсатында IREG Observatory ретінде қайта құрылды.
Гүлмира СҰЛТАНБАЕВА
