Эйфель мұнарасының төбесінен қарағанда
Футбол кейде географияға ұқсайды. Биік таулар да, ұлан-ғайыр жазықтар да болады. Бірақ жеңісті жер бедері емес, кеңістікті ақылмен игерген құрама еншілейді. Бұл түні Пиреней таулары Альпіден биік көрінді, ал Жерорта теңізінің самалы Атлант мұхитының асау толқынынан асып соқты.
Францияның Испаниядан 0:2 есебімен жеңілуі — жекелеген футболшылардың сәтсіздігі емес, тактикалық шеберлік пен психологиялық үстемдіктің айқын көрінісі болды. Испания алғашқы минуттан-ақ матчтың дирижеріне айналып, ойынның темпін де, бағытын да, мінезін де өзі анықтады. Ал Франция сол әуенге ілесуге мәжбүр болған оркестр секілді көрінді.
Матчтың тағдыры орталық алаңда шешілді. Родри бастаған испаниялық жартылай қорғаушылар допты өздеріне бағындырып, ойынның тамыр соғысын бақылауда ұстады. Біресе қысқа пастармен қарсыласын алдап, біресе қапталға ауыстырып, француздардың қорғанысын үнемі қозғалыста ұстады. Доп қуған Франция көп күш жұмсағанымен, ойынды өз қолына қайтара алмады.
Дидье Дешамның шәкірттері осы чемпионат бойы кеңістікті шебер пайдаланып, қарсы шабуыл арқылы қарсыластарын талай рет жазалаған еді. Бірақ бұл жолы Испания сол кеңістіктің өзін жауып тастады. Қос қанаттағы қорғаушылар уақытында кейін шегініп, Мбаппе бастаған шабуылшылардың әрбір қадамын бақылауда ұстады. Францияның ең қауіпті қаруы — жылдамдық еді. Онысы қынабынан суырылмай қалған қылыштай әсерсіз болды.
Испанияның жоғары прессингі француздардың ойын құру жоспарын алғашқы пастан-ақ күйретті. Доптан айырылған бойда бірнеше ойыншының бір мезетте қысым көрсетуі Францияның қорғаушылары мен жартылай қорғаушыларына еркін шешім қабылдауға мүмкіндік бермеді. Амалы таусылған француздар ұзын пастарға жүгінді. Алайда мұндай ойын мәнері Испания күткен сценарийдің дәл өзі еді.
Есеп ашылғаннан кейін де испаниялықтар қорғанысқа қамалып қалған жоқ. Керісінше, допты өз бақылауында ұстап, матчтың уақытын да, кеңістігін де өз мүддесіне қызмет еткізді. Олар қарсыласын жүгіртіп қана қойған жоқ, ойша да шаршатты. Бұл — қазіргі футболдағы ең қымбат қарудың бірі.
Психологиялық тұрғыдан да Испания өзін жеңімпаздай ұстады. Соңғы жылдардағы маңызды кездесулерде Франциядан бірнеше рет басым түскен тәжірибе ойыншыларға сенімділік сыйлады. Ал есепте артта қалған француздар асығыстыққа бой алдырып, эмоцияға ерік бере бастады. Сол сәттен бастап ойын тізгіні біржола Испанияның қолына көшті.
Бұл матч тағы бір ақиқатты дәлелдеді: қазіргі футболда жекелеген жұлдыздардың жарқылы жеңіс әкелуге әрдайым жеткіліксіз. Ұжымдық үйлесім, тактикалық тәртіп және ойын кеңістігін басқару қабілеті бәрінен биік тұрады.
Жартылай финалда Испания дәл осы үш қасиеттің үлгісін көрсетті. Сондықтан бұл жеңіс кездейсоқтық емес, футбол ақылының футбол күшінен басым түскен күні ретінде есте қалмақ.
Даллас аспанында француз әтешінің соңғы үні естілді.
Испан корридасының жеңіс дабылы соғылды.
Нұршат Төкен (ФБ парақшасынан)
