2026 жылғы 1 ақпаннан бастап мемлекеттік бюджеттік қаржыландырумен жұмыс істейтін ұйымдарға жоспардан тыс тексерулер жүргізуге мүмкіндік беретін жаңа мемлекеттік бақылау тәртібі күшіне енеді. Бұл туралы Білім министрлігі хабарлады.
Қандай ұйымдар тексеріледі?
Жоспардан тыс бақылау мына салаларға қатысты болмақ:
-
балаларды тамақтандыру;
-
білім беру;
-
тәрбие қызметтері;
-
денсаулық сақтау мен қауіпсіздікке қатысты қызметтер.
Тексеру қызмет көрсетудің алдында да, көрсету барысында да жүргізілуі мүмкін. Министрліктің айтуынша, бұл жаңа тәртіп бақылауды жылдамдатуға және ықтимал бұзушылықтарды уақытында анықтауға мүмкіндік береді.
Құқықтық негіз
Мемлекеттік бақылау Қазақстан Республикасының «Баланың құқықтары туралы» Заңымен реттеледі. Жаңартылған талаптар көрсетілетін қызметтің сапасы мен қауіпсіздігін күшейтуді көздейді.
Министрлік не дейді?
Білім министрлігінің Балалардың құқықтарын қорғау комитетінің төрайымы Насымжан Оспанова:
«Жоспардан тыс тексерулер балалардың құқықтарын қорғауды күшейтеді және мемлекеттік бақылауды жылдамдатады. Енді уәкілетті орган нақты бұзушылық туралы хабар түскен сәтте дереу нысанға бара алады», – деп атап өтті.
2025 жылғы 4 желтоқсанда Мемлекет басшысы «Қазақстан Республикасының мәдениет, білім, отбасы және мемлекеттік бақылау саласындағы кейбір заңнамалық актілеріне өзгерістер мен толықтырулар енгізу туралы» Заңға қол қойды.
Жаңа нормалар 2026 жылдың 1 ақпанынан бастап қолданысқа енгізіледі.
