Шымкенттің орталық паркінде Созақтағы көтерілісті басып-жаншуға қатысқан қызыл әскерлер жерленген. Әкімдік кеш те болса осыны қолға алып, қаншама адамның қанын мойнына жүктеген жендеттердің сүйегін ақыры басқа жаққа апарып жерлейтін болыпты.
Жазықсыз жандарды қырған бұлардың фашистерден ешқандай айырмасы жоқ. Сондықтан оларды қаланың қақ ортасына апарып ардақтап қоятындай себеп көріп тұрған жоқпын. Алматыдағы 28 панфиловшылар паркінің атын да қоса ауыстырып тастау керек осымен бірге. Қазіргі жастар панфиловшылардың кім екенін, не бітіргенін білмейді. Біліп те керек емес оларға. Панфиловшылардың жасаған «ерлігі» коммунистердің ойдан шығарған өтірігі екені талай жазылды осыған дейін. Бірақ қоғамдағы кейбір топтар осы өтірікке өлердей жабысып алып, айырылғысы келмейді. Идеологиялық қоқсық қой бұл, не керек ол бізге? Жаңа Қазақстанға жаңа приоритет, жаңа идеология керек емес пе? Өгізді де өлтірмейтіндей, арбаны да сындырмайтындай етіп, ең құрығанда «Соғыс ардагерлерінің паркі» деп атайық одан да оны. «За нами Москва, Россия» деген ана сөздер тіпті керек емес дәл қазір. Саясат та, әлем де адам танымастай өзгерді соңғы екі жылда. Фашистермен күрескен елдің өзі фашист болып шыға келгенін көз көрді, бүкіл ел безіп жатыр қазір олардан. Аталарының ерлігін айтқысы келгендер панфиловшылар жөніндегі осы өтірікке қарап қалған жоқ шығар?
(Жолымбет Мәкіштің ФБ парағынан
Әәй, Жолым би-ай! Созақтағы қырғын мен 1941 жылғы қырғынды несіне байланыстырасың? Тағы бастадың ба? ТАРИХ деген нәрсе бар. Өлсең де өшіре алмайсың.
Мәскеу түбінде қырғын тапқан жерлестеріміз ғой. Иә, ішінде өзге ұлт өкілдері де бар. Сол кезде сол алапат соғысқа әкелеріміз бен аталарымыз қаласа да, қаламаса да қатысты. Отан біреу, ортақ еді. Өткенге тас атсаң, болашақ сені зеңбірекпен ататынын неге ұмытасың? «Панфиловшылардың жасаған «ерлігі» коммунистердің ойдан шығарған өтірігі екені талай жазылды осыған дейін» дейсің. Мәскеуді бөспе орыстардың өздері емес, Қазақстанда жасақталған әскердің қорғап қалғандығына өздерінше бір жағы намыстанып, бір жағы қызғанып шығарып жүрген ресейлік бір өзің сияқты жолымбилердің оттаубайлары ғой. Ағаш шапсаң, жаңқа ұшатынын ауылда өскен сен білуге тиіс едің ғой. Әр кезеңдегі үстемдікке ие болған билік өз дегенін істететінін қарт тарих та, сол тарихтан хабары бар жандар да мойындайды. Ардагерлер аллеясы дегеніңе қосыламын. Әнебір ұран сөзді де алмастыру керек. Оны да қостаймын. Бірақ, тым әсіреңкіленбей, сергек те саралы түрде жазсаңшы жазатын пікіріңді. содан кейін. Фашистермен күрескен елдің өзі неліктен фашист болып шыға келді? Саралай аласың ба? Жоқ, әлде, құр байбалам ба сенікі? Халықтың осыншалық азғындауына не себеп? Кім кінәлі? Әуелі сол жағын өзіңе айқындап алшы! Содан соң сүйкектетерсің, сүйкектекізерің маза бермей жатса.
(Бейбит Мекеев ФБ парақшасынан)
