Қарағандыда жаңа жылдан бастап жылу тарифі көтеріледі. Бұл туралы әлгінде Karaganda.kz сайты «Теплотранзит Қарағанды» ЖШС-не сілтеме жасап хабарлады.
Ресми хабарламада:
-«Теплотранзит Қарағанды» ЖШС 2024 жылдың 1 қаңтарынан бастап тарифтің өзгеретінін хабарлады. Тариф ҚҚС-сыз Гкал үшін 4 433,59 теңгені құрайды. Аталған шешімді Қазақстан Республикасы Ұлттық экономика министрлігі Табиғи монополияларды реттеу комитетінің Қарағанды облысы бойынша департаментінің бұйрығы негізінде қабылданды,-делінген
. «2023 жылдың 1 қыркүйегінен бастап облыстағы орташа айлық жалақының өзгеруіне байланысты қолданысқа енгізілген «Теплотранзит Қарағанды» ЖШС-нің жылу энергиясын беру және тарату қызметтеріне қатысты тариф ҚҚС-сыз Гкал үшін 2 948,94 теңгені құрады. Бұл бүгінгі төлем құны. Алайда ол жылу бағасы 2023 жылдың 31 желтоқсанына дейін жарамды. Ал жыл аяқталуға тура бір ай ғана уақыт қалды. Кеншілер шаhарын жұлумен қамтамасыз ететін компанияның мәлімдеуінше, 1 қаңтардан бастап тариф ҚҚС-сыз Гкал үшін 4 433,59 теңгені құрайтын болады. Жылу бағасы қыс қаhарына мінер кезде неге өседі? Оған серіктестік жанама жауап айтуда.
-«Теплотранзит Қарағанды» ЖШС тарифтің қымбаттауын «Инвестицияларға айырбас тарифі» мемлекеттік бағдарламасы аясында кварталішілік жылу желілері мен ЦТП-29 сорғы стансасын қайта жаңғыртудың инвестициялық бағдарламасын бекітумен байланысты»- деп түсіндіреді.
Бүгін облыс әкімі Ермағанбет Бөлекпаевтың Қарағанды тұрғындарымен кездесуі өтеді. Көмір шығарып отырып, өз отыны өзіне жарымай қойған Қарағандыда жылу тарифі неге кенеттен өседі? Оған тосқауыл жасауға болмай ма? Әлеуметтік жағдайы төмен, жалақысы жарытымсыз жұртқа жергілікті билік жеңілдік жасаудың тетігін қарастырды ма? Осы сағатта әкім нысанасына көзделген өзекті сауал осы болмақ.
Еске сала кетейік, облыс орталығында жылу бағасы биыл 4 айдың ішінде 2 мәрте көтерілді.
Айтбала Сүлейменқызы
