Осыдан біраз күн бұрын украиндық дрондар Ресейдің Краснодар өлкесіндегі Каспий мұнай құбыры консорциумына тиселі «Кропоткинская» мұнай айдау бекетіне шабуыл жасағаны белгілі. Ресей жағы бекетке айтарлықтай зақым келгені һәм екі ай көлемінде жөндеуге тоқтайтынын, мұнай тасымалы кем дегенде 30 пайызға дейін төмендейтінін хабарлаған.
Осы мұнай құбыры арқылы еліміздегі «Теңіз», «Қашаған» және «Қарашығанақ» мұнай кеніштерінде өндірілген мұнай толығымен тасымалданып, Қара теңіз жағасындағы Новороссийск қаласында танкерлерге тиеліп, Еуропаға жөнелтілетін. Мұнай тасымалының 30 пайызға төмендеуінен 600 миллион доллар яғни 300 миллиард теңге Қазақстан жағы жоғалтады екен. Аз қаржы емес. Ал, мұның өтеуін кімнен сұраймыз? Украина әлде Ресей? Украинаға агрессорды тоқтату үшін Ресейдің стратегиялық орындарын атқылау, жою заңдылық. Оған дау айту қиын. Ал, өз жерінде орналасқан нысандардың қауіпсіздігіне Ресей жауап беруге тиіс! Каспий мұнай құбыры консорциумның жарғысында солай көрсетілген. Демек, біз 600 миллион долларды Ресейден сұрауға тиіспіз. Бірақ мұны Кремльден талап етуге Ақорданың құдіреті жете ме? Ендігі мәселе осы болмақ!
