Home Жаңалықтар АҚШ вирус жұқтырғандар бойынша әлемде бірінші орынға шықты

АҚШ вирус жұқтырғандар бойынша әлемде бірінші орынға шықты

98

АҚШ коронавирус жұқтырғандар саны бойынша әлемде бірінші орынға шықты. Worldometer сайтының мәліметінше, 26 наурызда АҚШ-та коронавирус жұқтырғандар 82 мыңнан асқан. Эпидемия басталғалы бері 1177 адам коронавирустан қайтыс болған (Қытайда – 3287 адам). Бейсенбі күні бір күнде 10 мыңнан астам адамға вирус жұққаны белгілі болды. 24 сағатта 150 адам қайтыс болған.

Нью-Йорк штатында 37 мыңнан астам адамға вирус жұққан. Нью-Йорк губернаторы Эндрю Куомо вирус жұқтырғандар күрт көбейгендіктен ауруханалар, медициналық мекемелер толып кетуі мүмкін деп мәлімдеді. Ауыр науқастарға қолданылатын өкпеге ауа жеткізетін аппарат жетіспеуі ықтимал. Нью-Йорк пен АҚШ-тың өзге штаттарында карантин жарияланды.

Конгрестің өкілдер палатасы 27 наурызда пандемия кезінде АҚШ экономикасы мен азаматтарын қолдау туралы шараларды заң жүзінде бекітеді. Шаралар пакеті 2 трлн долларға жетеді дейтін мәліметтер бар.

Өткен жылдың соңында Қытайда алғаш рет пайда болғалы әлемде коронавирус жұқтырғандар жарты миллионға жуықтады. АҚШ-тың Джон Хопкинс университетінің мәліметінше, 27 наурызда әлемде вирус жұқтырғандар 530 мыңнан асты. 24 мыңнан аса адам қаза болып, 120 мыңнан астам науқас дерттен айықты. Дүниежүзілік денсаулық сақтау ұйымы Covid-19 коронавирусын «пандемия» деп жариялаған.

Алдыңғы жазбаҚасым-Жомарт Тоқаев: Эпидемияны бәріміз бірге жеңеміз
Келесі жазбаҚызылорда облысының әкімі ұсталды