Қазақстанның сыртқы қарызы елдегі кез-келген азаматты алаңдататыны белгілі.. Бұл мәселе бүгін Мәжілісте көтерілді.
Депутат Ерлан Саиров бұл жөнінде былай дейді:
«Квазимемлекеттік сектормен қосқанда мемлекеттік қарыз 105 миллиард долларға жетті, бұл бүкіл бюджеттің 40 пайызы. Мемлекеттік қарыз 40 пайызға жететін болса, онда елде қаржылық мәселелер басталады. Бұрын кейбір елдер, Аргентина, Греция дәл осындай проблемадан егемендігінен айырылып қалды», – деді Саиров Мәжілістің жалпы отырысында.
Саиров үкімет мемлекеттік қарызды бақылаудың бірқатар тетігін қарастырғанын, бірақ депутаттардың барлық ұсынысы ескерілмегенін айтты.
«Бұл ең алдымен елдің ұлттық қауіпсіздігіне қатысты. Өздеріңіз білесіздер, мұндай қарыз проблемалары салдарынан кейбір мемлекеттер егемендігінен айырылған, бұл өте маңызды мәселе», – деді ол.
Ал, Премьер-министрдің орынбасары – қаржы министрі Ерұлан Жамаубаев:
«Бұл мәселе тек депутаттарды ғана емес, бізді де алаңдатады, өйткені мемлекеттік қарыздың өсуі жақсы емес. Соған қарамастан, бүгінде барлық ковенант жоғары деңгейде. Біз мемлекеттік қарызды көбейтпеу шараларын қабылдап жатырмыз», – дейді.
Айтқандайын, бюджет кодексінің жобасы қаралып, бірінші оқылымда қабылданды. Дегенмен, депутаттар тарапынан сын көп айтылды, екінші оқылымда Үкіметке қажетті өзгерістерді енгізу ұсынылды.
«Жалпы мемлекеттік қарыз мәселесі мемлекеттің ерекше бақылауында. Бюджет кодексі, талдау барысында айтқанымдай, ЕО халықаралық ұйымдарының сарапшылары… зерттеуі өте тиімді, сонымен қатар нақты құжат болуы керек. (…) Механизм ретінде, мүмкін, тапшылықты көрсете аламыз, бірақ осы тапшылықтарды өтеуге бағытталған қарыздар, оны қандай баптарда көрсетеміз – жоғары аудиторлық палатамен бірлесіп, депутаттық корпуспен бірлесіп жұмыс істейміз. Екінші оқылымға дейін шешім қабылдаймыз», – деп уәде берді вице-премьер.
