Қазақстан тәуелсіздік алғалы бері көп тармақты саясат ұстанып келе жатқаны белгілі. Әлбетте, енді – енді аяғынан тәй-тәй басып, етек-жеңін жинай бастаған жас мемлекетке дүниенің төрт бұрышымен тату болған һәм саяси-экономикалық байланыс орнатқан өте тиімді.
Содан болар еліміз, көрші отырған Ресей, Қытай, Азия, Орталық Азия елдері, Араб әлемі, Түркі дүниесі, Еуроодақ, АҚШ және Латын Америкасы елдеріменде қарым-қатынасты барынша жандандыру үстінде. Десек те, соның ішінде Қытайдың орны алабөтен. Әрі құдайы көрші әрі экономикалық һәм әскери қарым-қабілеті жағынан әлемнің алдыңғы орнына шыққан алпауыт. Халық санының миллиард жарымға тақау екені бөлек әңгіме. Қазақстанмен Қытай арасы жақсы. Сауда-саттық, экономикалық байланыс дұрыс жолға қойылған. Қазақстан Қытайды тауарын өткізетін әрі инвестиция тартатын, заманауи технология алатын ел деп таныса, Қытай Қазақстанды табиғи шикізатқа бай өлке әрі агропотенциалы тым жоғары республика деп таниды. Бұдан тыс транспорттық –логистикалық ел ретінде де мойындайды. Қазақстанның біраз мұнайы құбыр арқылы Қытайға құйылып жатқаны тағы бар. Содан болар ресми Бейжін Қазақстандағы жағдай тұрақты болғанын қалайды. Тіпті аждаһа елінің басшысы Си Цзиньпин бұдан бұрында, тіпті кешегі Астанада өткен Шанхай Ынтымақтастық ұйымының саммиті алдында да, Қазақстанның қауіпсіздігіне кепіл беретінін ескертті. Әрине Қазақстанға сырттан келетін жау жоқ. Дегенмен Си Цзинтпиннің бұл мәлімдемелері әлсін-әлсін «қазақтың біраз жері біздікі» деп даурығып жүрген Ресей саясаткерлеріне қаратыла айтылса керек-ті.
Өткен жылғы еліміздің сыртқы тауар айналымы 139,8 миллиард доллардың көлемінде болса, соның 41 млрд. доллары Қазақстан мен Қытай арасындағы сауда айналымына жатады. Бұл өте үлкен көрсеткіш. Ал, терістіктегі көршіміз Ресеймен бар жоғы 26 млрд. доллар екен. Еуроодақпен 10,2 млрд болса, түбі бір түркі Түркиямен сауда айналымы не бәрі 6 млрд. доллардың көлемінде. Демек Қазақстан үшін Қытайдың орны бөлек. Алдағы уақытта аспан асты елі Қазақстанмен ғарыштық бағытта да бірлесе жұмыс істеп, Байқоңыр ғарыш айлағын пайдалану ниеті барын білдіріп отыр. Осының бәрін сарапқа салатын болсақ, Қытай неге сонша Қазақстанның бүтіндігіне, тыныштығына, қауіпсіздігіне мүдделі болып отыр деген сұрақтың жауабы шыға келеді. Яғни, Қытай үшін Қазақстан орсан –зор шикізат отаны һәм Батысқа тауар тасымалдайтын транспорттық-логистикалық дәліз. Демек, мұнай, түрлі-түсті метал, астық тб. өнімдер алатын әрі өз тауарын осы елдің жері арқылы сыртқа тасымалдайтын болғандықтан аждаһа елі Қазақстандағы жағдай тұрақты болғанын қалайды. Ресми Астанаға да осы керек. Алайда, қарапайым жұрттың көкейінде «қытай синдромы» деген бар. Бұл енді басқа әңгіме.
Азаматхан Әміртай «Жасылдар» партиясының төрағасы
