Бір Ақтөбе облысының өзінде су тасқынынан 51 млрд теңге шығын келген. Оның 40 млрд теңгесі республикалық бюджеттен бөлінбек. Ал қалған 10 млрд теңге облыстық бюджет резервінен қарастырылады екен.
Сөйтіп бұл қаржыға үй салу, инфрақұрылым жүргізу, жол мен көпір құрылысы, әлеуметтік нысандарды қалпына келтіру жұмысы атқарылмақ.
Республикалық бюджет есебінен тасқын кезінде зардап шеккен 2 мектеп, 1 балабақша, 2 денсаулық сақтау мекемесі және 3 мәдениет нысанын жөндеуге 4,6 млрд теңге сұралапты.
Шамамен 916 отбасына төленетін өтемақыға 3,6 млрд теңге, мал шығыны үшін өтемақы төлеуге 2,2 млрд теңге қажет екен.
Бізде су тасқынына байланысты төтенше жағдай жарияланған Ақтөбеден өзге 9 облыс бар. Олардың резервтегі ақшасы шығынның жартысын жабуға жете ме екен? Әй қайдам..
Бұған дейін су тасқыны кезінде қираған бір үйдің құны – 22 млн теңге деген ақпарат шығып еді. Бұған қырылған мал басын қосыңыз. Обшым бюджетке оңай болмайын деп тұр.
Биыл Астана экономикалық форумы өтпейді. Қызық, бұған дейін бұл форумды өткізу инвесторлар есебінен, үкіметтен көк тиын да жұмсамаймыз деп еді.
Сөйтсек, жұмсалады екен. Әйтпесе, «бюджет үнемдеу үшін өткізілмейтін болды» деген нәрсе айтылмайтын еді.
Мәселе, тек бір форумда ғана емес, алдағы 3 жыл бойы негізсіз жиындар мен форумдарды қоя тұру керек шығар.
Бір деректерде ҚЗ бюджет дефициті 3 трлн теңге деп айтылып жүр. Оның жыртығын жамау оңайға түспейді.
Ерке ЖҰМАТАЙ (ФБ парақшасынан)
