Алматы Сейсмология институты мен ТЖД өкілдері жақын арада болатын жойқын жер сілкінісі туралы тарап жатқан хабарламаға байланысты мәлімдеме жасады, – деп хабарлайды dodanews.kz тілшісі.
Тікелей эфирде сарапшылар алматылықтарды мазалаған сұрақтарға жауап берді.
«Біздің ғылыми орталықта зерттеу жұмыстары тұрақты түрде жүргізіледі. Жер қыртысына қатысты 200-ге жуық параметрді зерттеп, қорытынды жасаймыз. Болжам комиссиясының қорытындысына сәйкес, осы аптаның қысқа мерзімді болжамына сәйкес, 10 қаңтар мен 17 қаңтар аралығында Алматы болжау полигонында магнитудасы 5,5 жойқын жер сілкінісі күтілмейді. 2024 жылға арналған орта мерзімді болжам қаңтардың аяғында дайын болады. Біз мәліметтер базасы бойынша пікір береміз, біздің бөлімде он зертхана жұмыс істейді. 1998 жылдан бері Алматы бойынша болжамдар расталып келеді. Тұрғындардан үрейленбей, сақтық шараларын білуді сұраймыз», – дейді ТЖМ Сейсмологиялық бақылау және зерттеулер ұлттық ғылыми орталығының орынбасары Нұрсарсен Өзбеков.
Сейсмологтар блогерлер мәлімдемесінің ғылыми негізі жоқ деп отыр. «Иә, ғылыми орталықтың болжамдары расталып келеді. Былтыр да 2023 жылға арналған болжамдық комиссияның қорытындысын шығардық, оған сәйкес магнитудасы 5,5 және одан жоғары болатын жойқын жер сілкінісі болжанбады. Өздеріңіз куә болдыңыз, бұл болжам расталды. Қазір әлеуметтік желілерде 15 қаңтарда Алматыда болуы мүмкін жойқын жер сілкінісі туралы ақпарат тарап жатыр. Блогерлердің мұндай болжамға қалай келгені белгісіз, өйткені оларда қандай да бір болжам жасауға арнайы техника мен технология жоқ. Біз олардың мәлімдемесін негізсіз деп санаймыз. Хабарламаға назар аударудың қажеті жоқ. Дүрбелеңге негіз жоқ», – дейді Нұрсарсен Өзбеков
Айпақшы Аламыт үшін қанша балдық жер сілкінісі қауіпті деген сұраққа да жауап болды.
«Бұл мәселеге қатысты сейсмологтар әзірлеген халықаралық шкала бар – MСК-64 шкаласы. Осы шкала бойынша, ғимараттар мен құрылыстардың айтарлықтай қирауы 7 балдан басталады. Сондықтан, Алматыда жер жағдайын ескере отырып, жер сілкінісі 7 балдан жоғары болса, қауіпті деп санауға болады», – деді ТЖМ Сейсмологиялық байқаулар мен зерттеулер ұлттық ғылыми орталығының орынбасары Нұрсәрсен Өзбеков Tengrinews.kz сұрағына жауап бере отырып.
Маманның айтуынша, 7 балға дейінгі жер сілкінісі қала үшін қауіпті емес.»2-3 балдан бастап – бұл ғимараттардың шамалы теңселуі, 4-5 балл – бұл сылақтың бүлінуі және басқа да зақымданулар. Бұл қауіпті емес. 7 балдан бастап шара қолдану керек, барлық ғимараттарымызды жер асты дүмпуі әсеріне қарай есептеп, дайындау керек», – деді Өзбеков.
